【轮证赢家】反手开熊

【轮证赢家】反手开熊放大图片

噚日只恒指牛(60281)喺朝早10点几时见到DMI嘅ADX背驰而行,就拿拿声不问价咁将只(60281)送走,本身仲谂住睇吓可唔可以将噚晚同个中一同学阿贤食嗰餐生日饭嘅水平提高啲,最终都係失败;最好笑嘅係本身想食嗰间竟然喺7点半都未到就整个牌喺度话休息,我都几肯定唔係有人惩罚佢,因为係「休息」牌嘅背后係写住「试业中」,唯有信係呢个原因啦。

今朝起身时觉得好清凉,天气真係转啦,公司隔离team有条友咳到个膶甩完再甩;噚晚同同学食饭嘛,大家年纪相约,都已经係中女一名,见佢戴住条薄颈巾保暖,今日都驱使我去搵返条巾出嚟戴一戴,结果返到公司被个年纪大过我嘅同事话我:「使唔使咁冻呀?」係你迫我答架:「年纪大嘛!」

依家9点55分,恒指做紧26661点,跌125点,跌幅比今日开市时多咗,而喺日线图上明显见到恒指处于10天线(26745点)以下水平,睇嚟27000点+100天线+「中长期下降轨」呢个组合嘅威力都真係非同小可。依家恒指下方再望嘅就係20天线(26435点),亦即係保历加通道中轴。亦由于大市明显下行,所以技术指标都已经发出看淡讯号。

依家10点34分,见恒指啲天线同技术指标都无咩方向,于是就计咗条Fibonacci嘅数出嚟,由今年4月15日高位30280点同今年1月3日低位24896点计,一画就画到之前个高位原来顶住个0.5(27588点)水平,而最近呢两个顶就落到去0.618(26952点)呢个位,睇嚟27000点+100天线+「中长期下降轨」呢个组合,要再加多个0.618先得。

睇埋恒指牛熊证街货图,按截至10点39分,恒指最低做过26625点计,最贴价嘅牛证26700至26799点已经全数收回,再落多一层嘅26600至26699点,其实大部份街货都係死晒;虽然依家见恒指跌幅收窄至跌52点,报26733点,「十字星」挂咗喺条10天线上面,但暂时都仲未能够上返10天线以上水平,且今日一跌恒指现价同下方牛证重货区26400至26499点只係相差大约300至400点距离,反手出恒指熊(56299),收回价27200点,同现价有近500点差距,46倍槓桿係同一收回价之中最高。见恒指5分钟图由超卖回升至中轴水平,比多少少时间个市先至落场。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

上一篇: 下一篇: